الدحلاب أحمد عفيفي.. بين الماضي و الحاضر والمستقبل. كل واحد فينا له ماضي، لما يرجع يفتكر الماضي ده هيلاقي فيه تناقضات مع الحاضر، قد يكون التناقضات دي جات بسبب مواقف حصلت فكانت السبب في تغيير أفكارك، أو أنت ادعيت إنك غيرت أفكارك، لأنك شخص وصولي بطبعك، وده أحمد عفيفي. ماضي عفيفي بيقول إنه شتم مرتضى منصور بالأم، لكن حاضره ومستقبله شايف إن مرتضى منصور رئيس نادي الزمالك حامي الحمى والدرع والسيف.. ليه؟ لأن مرتضى ممكن يشوفله مكان جنب اخواته في قناة النادي مثلًا، مرتضى يجيبه محلل أداء تاني زي ما كان موجود مع ميدو مثلًا. ماضي عفيفي بيقول إنه شتم لاعيبة الأهلي وخاض في أعراضهم وتنمر عليهم، لكن حاضره ومستقبله شايف إن ده عيب وغلط ومفيش أي مبرر انساني يخليك تتنمر على شكل حد حتى لو الشخص ده شتمك، ومينفعش نخوض في عرضه.. ليه؟ لأن الكلام هو ده اللي هيساعد أحمد عفيفي إنه يشتغل في قناة عامة زي ما كات موجود في DMC أو صدى البلد قبل كده، وأي كلام غير ده هيضيع فرصه في الشغل في أي قناة حيادية مثلًا. ماضي عفيفي بيقول إنه مشجع زملكاوي درجة تالتة على استعداد إنه يدخل في صراع مع أي حد حفاظًا على كرامة ناديه، وتبنيًا لقضايا النادي ولقضايا جمهوره، لكن حاضره ومستقبله شايف الوين وين سيتيويشن على حساب كرامتهم، واحد يقول إيريك جاب الجول بأيه وعادي، يقول لاعيبتكم دي بفلوسي وأنا اللي جايبهم ومش هجيبلكم لاعيبة تاني، فيقوله ليه كده يا أبو ناصر، ده إحنا اتفتحنا واستقبلناك استقبال الفاتحين. ماضي عفيفي بيقول إنه شتم الخلايجة وتهكم على فكرهم وأسلوبهم وحقر منه، لكن حاضره ومستقبله شايف إنه عادي الخليجي اللي أنت مش مقتنع بفكره ده يجيب كمتحدث إعلامي لناديخ، ويستخدمك عشان يجيبك يمين وشمال عادي ماضي عفيفي طبيعي، لكن حاضره ومستقبله بيدعي المثالية وعنده الاستعداد إنه يبوس الأيادي ويدوس على كرامته.. طالما ده اللي هيوصله لأهدافه. ماضي عفيفي بيقول حاجات كتير مختلفة عن حاضره ومستقبله - لو اتكلمنا عنهم كلهم مش هنخلص - .. الاختلاف ده لأن عفيفي وصولي وانتهازي، مش لأنه قعد مع نفسه وراجع أفكاره دي، فقدر يشوف الصح منها وتمسك وتخلى عن الأفكار الغلط